वयोवस्था शांती

५० वर्षे पूर्ण झाल्यावर वैष्णवी शांती करावी. सगळ्या प्रकारचे रोगशमन उत्तम दृष्टी, भार्या, पुत्र वियोगादी तसेच सकल प्रकारचे अरिष्ट निवारण्यासाठी वैष्णवी शांती करावी.

वयाची ५५ वर्षे पूर्ण झाल्यानंतर वारुणी शांती करावी.

वयाची ६० वर्षे पूर्ण झाल्यानंतर आपणास अपमृत्यू, वाईट स्वप्नदर्शन, राजभय, छायाविकृती, विविध दर्शन, सकलपातक नाशाकरिता तसेच अनेक प्रकारच्या रोगांचे निरसन होऊन दीर्घ आयुष्य प्राप्तीकरिता उग्ररथ शांती करावी.

वयाची ६५ वर्षे पूर्ण झाल्यानंतर मृत्युंजय महारथी शांती करावी.

वयाची ७० वर्षे पूर्ण झाल्यानंतर उत्तम आरोग्यप्राप्तीकरिता तसेच प्राप्त झालेले रोग, पीडा यांचे निरसन होण्याकरिता भैमरथी शांती करावी.

वयाची ७५ वर्षे पूर्ण झाल्यानंतर उत्तम प्रकारचे आरोग्य व आयुष्य वृद्धीकरिता ऐंद्री शांती करावी.

वयाची ८० वर्षे पूर्ण झाल्यानंतर उत्तम प्रकारचे आरोग्य व आयुष्यवृद्धीकरिता सकल पातकांचा नाश, छायादोष तसेच शारीरिक कांती सतेज राहण्याकरिता सहस्रचंद्रदर्शन शांती करावी. त्याचे पुढीलप्रमाणे महत्त्व जाणून घेऊ. आपल्या जीवनात आपण १००० चंद्र पाहतो, ते कसे:
सर्वप्रथम आपण हिंदू कालगणनेबद्दल थोडी माहिती करून घेऊ. हिंदू कालगणना चांद्र-सौर पद्धतीची आहे. म्हणजे, चांद्रमास प्रचलित असून अमावास्येच्या वेळी सूर्याच्या राशीवरून महिन्यांचं नामकरण केलं जातं. उदा. मीन राशीत सूर्य असताना अमावास्या झाली, की त्यानंतर सुरू होणार्‍या महिन्याला ‘चैत्र’ हे नाव देण्यात आलं व याप्रमाणे पुढील महिन्यांचं नामकरण केलं गेलं. सूर्य एकाच राशीत असताना दोन अमावास्या झाल्या, तर अनुक्रमे अधिक व निज असे एकाच नावाचे दोन महिने होतात. (उदा. अधिक श्रावण, निज श्रावण.) अधिक महिना दर तीन वर्षांनी येतो. याचा अर्थ, हिंदू कालगणनेनुसार तीन वर्षांत १२X३+१ = ३७ महिने येतात. (क्षयमासाचा अपवाद वगळला आहे.) म्हणजे, ३ वर्षांत ३७ पौर्णिमा (३७ वेळा पूर्णचंद्र दिसतो) त्यानुसार ८१ वर्षांत ३७X२७ = ९९९ वेळा पूर्ण चंद्र दिसतो. याचा अर्थ, पौर्णिमेचा जन्म असल्यास ८२व्या जन्मदिवशी (पंचांगानुसार ८१ वर्षे पूर्ण होतात तो दिवस) व इतर कोणत्याही तिथीचा जन्म असल्यास ८२व्या जन्मदिवसानंतर येणार्‍या पहिल्या पौर्णिमेला १०००वा पूर्णचंद्र दिसेल. हाच सहस्रचंद्रदर्शन सोहळ्याचा दिवस.

वयाची ८५ वर्षे पूर्ण झाल्यानंतर सकल अरिष्ट निरसन होऊन उत्तम आरोग्य व नवग्रहांची कृपादृष्टी प्राप्त होण्याकरिता रौद्री शांती करावी.

वयाच्या शांत्या करतेवेळेस आपणास दीर्घ आयुष्य, वार्धक्यामधील शारीरिक दोष जाऊन कायिक, वाचिक, मानसिक दोष निवृत्तीकरिता तसेच चारी पुरुषार्थ प्राप्तीकरिता,  धनधान्य तसेच पुत्रपौत्रांच्या वृद्धीकरिता, बहुकीर्ती प्राप्त होण्याकरिता, भगवान महामृत्युंजयाची कृपादृष्टी प्राप्त होण्यासाठी जसे की, गूळ, साखर, धान्य, हिरण्य आदी वस्तूंनी तुलादान करावे.