वास्तुशास्त्र

ग्वाल्हेरच्या शिंदे राजघराण्यातील पुरुष साठ वर्षांहून अधिक काळ जगत नाही. हा त्यांच्यातील शारीर दोष नाही. ग्वाल्हेरच्या राजवाड्यात असा कोणता तरी दोष असेल, ज्यामुळे पुरुषाचा मृत्यू लवकर होतो. हा निकष उचलली जीभ लावली टाळ्याला असा नाही. याबाबत वेदात, पुराणातही काही संदर्भ सापडतात. इसवी सन 1480 मध्ये उदयपूरचे राजे कुंभकर्ण यांच्या काळात श्रीमंडन याने वास्तुशास्त्रावर ग्रंथ लिहिला होता. त्यावर 1891 मध्ये राजवल्लभ नावाचे एक पुस्तकही प्रकाशित झाले होते. हे पुस्तक अतिशय मार्गदर्शक मानले जाते. पृथ्वीवरील चुंबकीय प्रवाह, दिशा, सूर्याची किरणे, वाऱ्याची दिशा, गुरुत्वाकर्षण या साऱ्यांचा वास्तुशास्त्रात विचार केल्याचे या ग्रंथात म्हटले आहे. राजवल्लभशिवाय मयशिल्पम, शिल्प रत्नाकर, समरांगण सूत्रधार हे दुर्मिळ ग्रंथही वास्तुशास्त्रासंदर्भात महत्त्वाची माहिती देतात. अथर्ववेद, यजुर्वेद, भविष्य पुराण, मत्स्यपुराण, वायूपुराण, पद्मपुराण, विष्णू धर्मोत्तर पुराण, गर्ग संहिता, नारद संहिता, सारंगधर संहिता, बृहत् संहिता यातही वास्तुशास्त्राविषयी बरीच माहिती मिळते.

वास्तुशास्त्र काय सांगते? तर प्रत्येक वस्तूचे स्थान काय आहे, ती कुठे असायला पाहिजे याविषयीचे मार्गदर्शन करते. घरात स्वयंपाकघर दक्षिण पूर्व कोपऱ्यात असावे. पूजेची खोली वा स्थान उत्तर- पूर्व कोपऱ्यात हवे. बेडरूम दक्षिण-पश्चिम कोपऱ्यात हवी. पाहुण्यांची खोली व मुलांची खोली उत्तर पश्चिम कोपऱ्यात हवी. पहिल्या खोलीतील बैठक उत्तर-पूर्व बाजूला हवी. झोपताना डोके दक्षिण वा पूर्वेला हवे. याला काही कारणेही आहेत. पूर्वेला सूर्याचे स्थान आहे. तो स्थिर आहे. दिवसभर थकल्यानंतर आपण झोपतो तेव्हा सूर्याची ऊर्जा आपल्या मेंदूला मिळते. त्यामुळे दुसऱ्या दिवशी काम करण्याची शक्ती आपल्यात उत्पन्न होते. जे डोके उत्तर किंवा पश्चिम दिशेला करून झोपतात ते नेहमी आजारी, रोगी, निराश मनःस्थितीत आढळतात.

वास्तुशास्त्राची काटेकोर अंमलबजावणी नवी वास्तू बांधतानाच होऊ शकते. याचा अर्थ सध्या अस्तित्वात असलेली वास्तू या शास्त्रास अनुकूल करता येत नाही, असे नाही. सुख, समृद्धी, समाधान हवे असल्यास घर, दुकान यात अनुकूल बदल केले पाहिजे. त्याच वेळी वास्तुशास्त्र म्हणजे लॉटरीचे तिकीट नाही, हेही लक्षात ठेवले पाहिजे. हे तिकीट लागले की जो धनलाभ होतो, तसाच लाभ लगेचच बदल केल्यानंतर मिळतो असे नाही. तो हळूहळू जाणवू लागतो. अनुकूल वास्तुरचना झाल्यानंतर आपल्य मनात सुख, समाधान या भावना वास करू लागतील. आनंद, उत्साह आपल्या आयुष्यात येतील. नवी ऊर्जा मिळेल. कोणतेही काम हाती घेतल्यास यश लाभेल. हे बदल हळूहळू जाणवतील. वास्तुशास्त्र पाळल्यास ही फळे मिळतील.

निसर्ग नियमानुसार आपले घर कसे बांधावयाचे शास्त्र आहे वास्तुशास्त्र. पूर्वी माणूस जंगलात, शेतामध्ये, डोंगरात राहायचा म्हणजे निसर्गाच्या जवळ राहायचा. ऊन, वारा, पाऊस, मोकळी हवा या सर्व गोष्टी शरीराला आवश्यक त्या मिळायच्या. त्यामुळे त्यांचे आरोग्य चांगले राहायचे. आरोग्याच् समस्या (मेडिकल प्रॉब्लेम) कमी असायच्या. गावाकडील कोणताही शेतकरी पाहा, त्याचे आरोग्य शहरातील माणसापेक्षा नक्कीच चांगले असते, कारण शेतकरी शेतामध्ये दिवसातील १२ तास हवेत, उजेडामध्ये, उन्हामध्ये राहून काम करतो आणि शहरातील माणूस १२ तास बंदिस्त रूममध्ये बसून काम करतो. शरीराला आवश्यक हवा, उजेड, सूर्यप्रकाश मिळतच नाही. त्यामुळे आरोग्याच्या समस्या वाढत आहेत. येणारी पुढची पिढी आपले वंशज हे चार भिंतींच्या आत स्वतःला बांधून घेणार हे पूर्वीच्या काळातील ऋषी-मुनी यांना माहीत होते. त्यामुळे त्यांनी निसर्गनियमानुसार घर कसे बांधता येईल याचा शास्त्रोक्त अभ्यास करून मयमुनी मयासुर व विश्वकर्मा यांनी भारतीय वास्तुशास्त्राची ग्रंथरचना केली आणि वैदिक पद्धतीने बांधकाम कसे करता येईल याची शास्त्रोक्त माहिती मयमतम व विश्वकर्मा प्रकाश या ग्रंथामध्ये दिली आहे.

१) वास्तुशास्त्रानुसार घर असल्याने माणुस जास्तीत जास्त निसर्गाच्या जवळ राहतो.
२) पृथ्वीच्या मॅग्नेटिक फिल्डनुसार उत्तरेला पाय करून झोपल्याने आरोग्य सुधारते.
३) आग्नेयेला किचन असल्याने स्वयंपाक रुचकर, स्वादिष्ट, पौष्टिक होतो, त्यामुळे चांगले अन्न तयार होते व शरीर सुदृढ होते.
४) घर वास्तूनुसार असेल तर शिक्षण, आरोग्य, व्यवसायात भरभराट उत्तम राहते.
५) शुभ ऊर्जा घरामध्ये संतुलित राहिल्याने आनंददायी वातावरण कायम राहते व घरातील सगळ्यांची मानसिक, शारीरिक, आध्यात्मिक प्रगती होते.
६) मुलांची शारीरिक, बौद्धिक, मानसिक, शैक्षणिक प्रगती चांगली होते.
७) नवनवीन कल्पना आयुष्यात सुचतात व व्यवसायात प्रगतीमध्ये चांगली वाढ होते व आर्थिक आवक चांगली राहते.
८) वास्तूनुसार घर असेल तर नातेवाईक, शेजारी व मित्र यांच्याशी सलोख्याचे प्रेमळ संबंध राहतात.
९) बांधकामाचे नियम शास्त्रोक्त पद्धतीचे असल्यामुळे केलेले बांधकाम कायमस्वरूपी टिकून राहते.
१०) पाणी, अग्नी, वायू, पृथ्वी व आकाश या पंचतत्त्वांच्या एकत्रित संतुलनामुळे वास्तूमध्ये शुभ ऊर्जा कायम टिकून राहते व घरातील सर्वांची सर्वांगीण प्रगती चांगली होते.